Oleh: Toni Mbukut
(Pencinta Tombo Turuk)
Danong one ca beo manga sua ase kae ngasang hi Nabas agu hi Mias. Ise cua anak lalo, ai poli mata ende agu ema dise. Hi Nabas agu hi Mias ho’o seber te ngo riang kode one uma dise ata lupi puar mese. Hitu kanang uma dise ata reding le ende agu ema de.
Ca wie, du tiong cekeng gok latung, ise toko one uma, one sekang dise. Du hitu ise toe kong kole musi mbaru ai penong keta kode ata ngo one uma dise.
Rapak de du wie mese keta tana, ise toko one ca wongka one sekang hitu. Laring keta lemot dise toko, cain kat empo rua. Mai empo rua hitu cengka para sekang, poli hitu cambol hi Nabas agu hi Mias. Bo ciek di Nabas agu hi Mias, landing toe manga can ata denge ise. Cait ise kanang ata toko one uma du wie hitu.
O de empo rua ho’o wendo ise ba one puar mese. Cai one sekang diha ata lupi ngampang, hi empo rua pongo hi Nabas agu hi Mias one ca haju mese. Hi Mias agu hi Nabas du hitu cebong keta retang agu ciek. Landing ceing di ata denge ise one puar mese hitu tong.
Woko poli pongo hi Nabas agu hi Mias, hi empo rua ngo dali piso agu ngo teneng wae kud kakur nuru di Nabas agu hi Mias. Pas keta remeng nggitun hi empo rua, mai tae di Nabas kud hi Mias: “Oe Mias emo retang agu ciek ge! Ite paka pikir co caran kud nganceng losi!” “Ole Nabas co di cara losin tong ta, poli taung pongo dite cua li empo rua ga”, tae di Mias. “Gereng kat e Mias manga kat laku caran tong”, wale di Nabas.
Du poli dali pison’ hi empo rua, mai tae di Nabas “Oe empo olong hang aku ite ye, ai nuru daku ata mecik keta.”Tu’ung ko?”, rei di empo rua. “Landing laku toi cara panden ne empo kud tambang mecik ne tong nuru daku”, tae di Nabas kole. “Eng ta co cara ne?”, rei di empo rua. “Landing caca di kaku kali lite ye empo.” O lorong kad li empo rua te caca hi Nabas.
“Emi lite nggurus ca dako ne empo agu emi can tidek ata lewe keta”, tae di Nabas. Mai hi empo rua emi nggurus agu tidek hitu. “Tapa muing lite tidek situ empo, kong laku keco de nggurus”, jera di Nabas. Lorong kat kole li empo rua.
Du poli keco de nggurus situ, mai hi Nabas na one leke, poli hitu haor agu wae. Mai tae di Nabas: “Ho’os nggurus so empo.” Pas du los limen hi empo rua kud tiba nggurus situ, mai kad hi Nabas siram one mata di empo rua. Ciek di empo rua hot nggo’o. Remeng keta ciek agu kecol matan hi empo rua, mburuk kat hi Nabas ngo emi tidek hot laring tapa, poli hitu ceka du nua bontong di empo rua. Tambang keta ciek ne hi empo rua agu sangge wencok. Toe noing liha du wencok cala one longka sot tulu talak kid watu ici. O de pa’u nitu wan hi empo rua. Bike taung sa’in’ le watu ici.
Woko ita li Nabas poli matan hi empo rua, o de hia ngo caca hi Mias. Retang di Mias kole hot nggo’o agu nggao hi Nabas. Poli hitu ise kole one sekang lut hele salang di empo rua.***
Editor : Edid Teresa
Komentar